《梅子林村客家飲食文化工作坊》

早幾日天氣凍冰冰，但有一群年青人懷著熾熱嘅心，無懼寒風走入山旮旯梅子林，聽講仲搞到梅子林㷫烚烚，#到底發生過甚麼事？ 請看下文。

原來係無止橋帶咗「學校起動」(Project WeCan) 計劃嘅兩間中學 10 幾位師生去深入認識位於沙頭角嘅梅子林村。

我地好感謝梅子林村曾玉安村長同埋幾位村民嘅熱情接待和細心講解，同學仔認識到梅子林村的歷史、文化和未來嘅保育規劃。係曾村長帶同學仔遊走梅子林期間，佢地顯得異常雀躍，處身於這片遠離都市、被翠綠圍繞嘅山頭，紛紛發出這裡有「山中世外桃源」之感嘆，且對保留了歷史痕跡嘅村中建築，以及村內出土嘅文物，例如係以前村民用過嘅農具等十分感興趣，而數當中最讓人會心微笑嘅係同學仔都以為梅子林村係盛產梅子嘅，無諗到依家種嘅卻係柑同桔！

現實也許與預期有差別，但這種落差也正係提醒我地鄉郊保育嘅重要性。

遊走完畢，同學仔就要幫手準備客家菜午餐。其實，幾位村民係活動前幾日已經四出挑選食材、洗乾淨、切好、一份份咁包好。幾位村民所付出的，同學仔同埋無止橋都感到好窩心。多謝你地呀！

同學仔個日大飽口福，蓮藕炆淮山、沙葛炒魷魚、客家羅漢齋、客家炆豬肉、五色鹹湯圓 (邊五色呀？有紅菜頭、蝶豆花、板藍葉、芋頭、紫蕃薯) 仲有炒米茶呀。幾位村民邊煮邊食邊介紹客家菜式俾同學仔知道。

曾村長為咗答謝同學仔千里迢迢走進山旮旯梅子林，帶埋同學仔一齊去摘柑同桔，個個都滿載而歸啦。

希望同學們從認識梅子林，擴展至認識香港鄉郊，最後能夠認識自己；

希望帶走果實的同學們，友誼無止，梅子林，青山不老。